राजनीतिक विरासत, शक्ति केन्द्र वा पहुँचको भरमा होइन, जनताको बीचमा गरेको निस्वार्थ सेवाको बलमा नेतृत्वको प्रतिस्पर्धामा उत्रिएका अर्याललाई धेरैले “सेवाबाट राजनीतिमा प्रवेश गरेको प्रतिनिधि पात्र” का रूपमा लिएका छन्।

कोरोना महामारीमा बने जीवनरक्षक अभियानका अगुवा

कोरोना महामारीको दोस्रो लहरले देश आक्रान्त बनेको समयमा अक्सिजन अभावका कारण सयौं परिवार पीडामा थिए। त्यही कठिन घडीमा सागर अर्याल अक्सिजन खोज्ने, व्यवस्थापन गर्ने र बिरामीसम्म पुर्‍याउने अभियानमा दिनरात खटिए। रातको २ बजे होस् वा बिहानको ४ बजे, सहयोगको आग्रह आएपछि उनी आफैं अक्सिजन सिलिन्डर बोकेर अस्पताल र घरसम्म पुग्ने गर्थे। उनका ती प्रयासले धेरै बिरामीलाई नयाँ जीवन र परिवारलाई आशा दिएको स्मरण आज पनि धेरैले गर्छन्।

लकडाउनका भोकालाई भोजन, अलपत्रलाई गन्तव्य

लकडाउनका कारण हजारौं श्रमिक र विपन्न नागरिक भोकभोकै बस्न बाध्य भएका बेला अर्यालले निःशुल्क भोजन वितरण अभियान सञ्चालन गरे। काठमाडौंका विभिन्न स्थानमा उनले खाद्यान्न र तयार खाना वितरण गर्दै संकटमा परेकाहरूको सहारा बने। त्यति मात्र होइन, घर फर्किन नपाएर राजधानीमा अलपत्र परेका सयौं नागरिकलाई आफ्नै पहलमा निःशुल्क यातायातको व्यवस्था गरी सुरक्षित रूपमा घरसम्म पुर्‍याए। संकटका बेला देखाएको यो मानवीय व्यवहारले उनलाई धेरैको मनमा विशेष स्थान दिलायो।

सुत्केरी आमा र बिरामीका लागि रक्तदान अभियान

स्वास्थ्य क्षेत्रमा पनि उनको योगदान उल्लेखनीय छ। आकस्मिक रगत आवश्यक परेका बिरामी, विशेषगरी सुत्केरी महिलाका लागि उनले रक्तदाता सञ्जाल निर्माण गरी आवश्यक समयमा रगत उपलब्ध गराउने अभियान सञ्चालन गरे।

सामाजिक सञ्जालमार्फत गरिएको एउटा सन्देशले केही घण्टामै रक्तदाता जुट्ने वातावरण बनाउने उनको प्रयासले धेरै परिवारलाई राहत दिएको छ। धेरैले उनलाई “जीवन बचाउने अभियन्ता” का रूपमा समेत चिन्ने गरेका छन्।

विपद्को समयमा पहिलो पंक्तिमा भूकम्प, बाढीपहिरो, आगलागी वा अन्य प्राकृतिक विपद्का बेला सागर अर्याल राहत सामग्री बोकेर पीडितको घरदैलोमा पुग्ने गरेका छन्। खाद्यान्न, त्रिपाल, कम्बल र आवश्यक सामग्री वितरण गर्दै उनले पीडितसँगै दुःख बाँड्ने काम गरेका छन्। उनको विशेषता के थियो भने, सेवा प्रचारका लागि होइन, आवश्यकतामा परेका मानिससम्म सहयोग पुर्‍याउनका लागि केन्द्रित थियो। त्यसैले धेरै समुदायमा उनी नेताभन्दा पहिले समाजसेवीका रूपमा परिचित छन्।

महाधिवेशनमा सेवामुखी नेतृत्वको बहस

रास्वपाले सुरुदेखि नै जनताको जीवनसँग प्रत्यक्ष जोडिएको राजनीति गर्ने प्रतिबद्धता व्यक्त गर्दै आएको छ। सागर अर्यालको उम्मेदवारीलाई सोही सोचको प्रतिनिधित्वका रूपमा पनि हेरिएको छ।

अर्याल भन्छन्,

“म राजनीति गर्न होइन, राजनीतिलाई सेवाको माध्यम बनाउन आएको हुँ। संकटमा नागरिकसँगै उभिएको अनुभवलाई अब नीति निर्माण र संगठन निर्माणमा प्रयोग गर्न चाहन्छु।”

असार ७ देखि ९ गतेसम्म चितवनमा हुने महाधिवेशनमा उनको उम्मेदवारीले एउटा सन्देश दिएको छ— राजनीति केवल सत्ता प्राप्तिको माध्यम होइन, समाज परिवर्तन र सेवाको अभियान पनि हुन सक्छ।

संकटका बेला अक्सिजन बोकेको हात, भोकालाई खाना खुवाएको मन, बिरामीका लागि रगत जुटाएको प्रयास र विपद्मा पीडितको साथमा उभिएको समर्पण लिएर सागर अर्याल अहिले रास्वपाको केन्द्रीय नेतृत्वतर्फ अघि बढिरहेका छन्। अब महाधिवेशनले निर्णय गर्नेछ— सेवाबाट निर्माण भएको यो यात्राले नेतृत्वको नयाँ अध्याय लेख्छ कि लेख्दैन।